എആർഎം റിലീസ് സമയത്ത് കോടികളുടെ ആവശ്യം വന്നപ്പോൾ പണം തന്ന് സഹായിച്ചത് പൃഥ്വിരാജ്: ലിസ്റ്റിൻ

ടൊവിനോ തോമസിനെ നായകനാക്കി നവാഗതനായ ജിതിൻ ലാൽ സംവിധാനം ചെയ്ത് കഴിഞ്ഞ വർഷം പുറത്തിറങ്ങിയ ചിത്രമാണ് 'അജയന്റെ രണ്ടാം മോഷണം'. ടൊവിനോയുടെ കരിയറിലെ തന്നെ ഏറ്റവും കൂടുതൽ പണം വാരിയ ചിത്രവും ഇതായിരുന്നു. സിനിമ റിലീസ് ചെയ്യുന്നതിന് മുൻപ് ഉണ്ടായ ഫൈനൽ സെറ്റിൽമെന്റുകളിൽ പണം തന്ന് തന്നെ സഹായിച്ചത് നടൻ പൃഥ്വിരാജും സംവിധായകൻ അൻവർ റഷീദിമാണെന്ന് പറയുകയാണ് നിർമാതാവ് ലിസ്റ്റിൻ സ്റ്റീഫൻ. സിനിമയുടെ വിജയം ആഘോഷിക്കുന്ന ചടങ്ങിലായിരുന്നു അദ്ദേഹത്തിന്റെ പ്രതികരണം.

'സിനിമ റിലീസ് ചെയ്ത് കഴിഞ്ഞാണ് ഈ പടത്തിന്റെ ഒരു ബിസിനസ്സ് പോലും നടന്നത്. ഞാൻ ഇപ്പോൾ മൂന്നു നാല് സിനിമകൾ നിർമിക്കുന്നുണ്ട് ആ ധൈര്യത്തിൽ തന്നെ പറയാം ആ നാലു സിനിമകളും ചേർത്ത് വെച്ചാൽ ഈ സിനിമയുടെ ബജറ്റ് ആകുന്നില്ല. എനിക്ക് ഇത്രയും ധൈര്യമുണ്ടെന്ന് മനസിലാക്കി തന്നതും എആർഎം ആണ്. വലിയ സിനിമകൾ റിലീസ് ചെയ്യുമ്പോൾ ഫിനാൻസ് എടുത്തിട്ടാണ് അതിനു മുന്നേ ഉള്ള കാര്യങ്ങൾ സെറ്റിൽ ചെയ്തിരുന്നത്. ഈ സിനിമ ബിസിനസ്സ് ആവാതിരുന്ന സമയത് അല്ലെങ്കിൽ പറഞ്ഞ റേറ്റുകളിൽ ഞങ്ങൾ ഓക്കേ ആകാതിരുന്നപ്പോൾ ഫൈനൽ സെറ്റിൽമെന്റുകൾ ചെയ്യേണ്ടിയിരുന്നുവെന്നും ലിസ്റ്റിൻ വ്യക്തമാക്കി.

ആ സമയത്ത് കോടികളുടെ ആവശ്യമുണ്ട് എന്ന് പറഞ്ഞപ്പോൾ എന്റെ ഒരു കോളിൽ സഹായിച്ച പൃഥ്വിരാജ് സുകുമാരനോട് നന്ദി പറയുകയാണ് ഈ അവസരത്തിൽ. അതുപോലെ കുറച്ചുകൂടി വീണ്ടും പൈസ ആവശ്യം ഉണ്ടെന്ന് പറഞ്ഞപ്പോൾ എത്രയാണ് വേണ്ടതെന്ന് എന്ന് ചോദിച്ച് അക്കൗണ്ടിൽ ഇട്ടു തന്ന എന്റെ സംവിധായക സുഹൃത്ത് അൻവർ റഷീദിനോടുമുള്ള നന്ദി ഈ അവസരത്തിൽ രേഖപ്പെടുത്തുകയാണ്,' ലിസ്റ്റിൻ സ്റ്റീഫൻ പറഞ്ഞു.

ടൊവിനോ തോമസ് ട്രിപ്പിൾ റോളിൽ എത്തുന്ന എആർഎം മാജിക് ഫ്രെയിംസിന്റെ ബാനറിൽ ലിസ്റ്റിൻ സ്റ്റീഫനും യുജിഎം മോഷൻ പിക്ച്ചേഴ്സിന്റെ ബാനറിൽ സക്കറിയ തോമസും ചേർന്നാണ് നിർമ്മിക്കുന്നത്. മൂന്ന് കാലഘട്ടങ്ങളുടെ കഥ പറയുന്ന അജയന്റെ രണ്ടാം മോഷണം മലയാളം, ഹിന്ദി, തമിഴ്, തെലുങ്ക്, കന്നഡ എന്നിങ്ങനെ അഞ്ച് ഭാഷകളിലായാണ് റിലീസ് ചെയ്തിരിക്കുന്നത്.

കൃതി ഷെട്ടി, ഐശ്വര്യ രാജേഷ്, സുരഭി ലക്ഷ്മി എന്നിവരാണ് ചിത്രത്തിൽ നായികമാരായി എത്തുന്നത്. ബേസിൽ ജോസഫ്, ജഗദീഷ്, ഹരീഷ് ഉത്തമൻ, ഹരീഷ് പേരടി, കബീർ സിങ് , പ്രമോദ് ഷെട്ടി, രോഹിണി എന്നിവരും മറ്റ് പ്രധാന വേഷങ്ങളിൽ എത്തുന്നു. സുജിത് നമ്പ്യാരാണ് ചിത്രത്തിന് തിരക്കഥ ഒരുക്കുന്നത്. മലയാള സിനിമകളിൽ തുടങ്ങി ഇപ്പോൾ ബോളിവുഡിൽ വരെ എത്തിനിൽക്കുന്ന ജോമോൻ ടി ജോൺ ആണ് എആർഎമ്മിന്റെ ഛായാഗ്രഹണം നിർവഹിക്കുന്നത്.

Content Highlights: producer Listin Stephen tank to Prithviraj for helping relese of arm movie